كونوز وموروز (الحلقه الرابعه)

وفجأة برق موروز اكتر واكتر لما سمع حد بيقول . :هااااااي كونوز

كونوز:هااااي
موروز وهو مبرق عنيه .:مين الاخ !!!
كونوز:ايه
موروز:الي كان بيهاي ده
كونوز تنحت:بيهاي اممممممم اه دا تيتوز صاحبي بس مش اوي يعني
موروز :صاحبك!!!!!! يانهار ياولاه ,طب ازاي,من زمان يعني ؟
كونوز:لا هو مش كان موجود ,فجأة لقيته سكن في الفيلا اللي جنبنا
ولم اسأله كنت عايش فين يقولي اوت
موروز(اوت):لالالالالا دا كداااااااب من يومه

ماكانشي في خرابة عندنا اسمها اوت خالص

كونوز:ايه خرابة دي ياموروز انا اقصد كان برا مصر يعني
موروز:اه امال ايه طب مانا عارف *ايه الاحراج ده عديها بقى *
ايوة قوليلي قوليلي بقى الواد ده طلع هنا طب والله عال
كونوز:هو في ايه انت تعرفه؟
موروز :اعرفه؟!! والله العظيم هههههههههههه
يابنتي انا اعرفه عز المعرفه
كونوز:تعرفه منين بقى انت كنت اوت برضوا؟
موروز:هههههههههه اوت انا اخري خرابة السفح وارجع
والعيال بيقولوا عليا مقطع السمكة وزعانفها اه امال ايه
مفيش حد كان بيروح هناك غيري والواد....
كونوز قاطعته وهي مكشرة
كونوز:موروز براحة ايه السفح دي
موروز في سره*وبتشخط كمان مش كفاية صابر عليكي وانتى مش بتفهمي كدة*
دي ابعد خرابة في المنطقة كلها وجنبها بلاوي زرقة ماقولكيش
والواد تيتوز كان يبقى مفروس مني عشان انا بس اللي بروح هناك
ههههههههه فكرتيني ياشيخة يخرب بيت عقلك
كونوز لسه مذهولة :وايه كمان كمل انت كلامك جميل اوى
موروز في سره*هو انا بحكي حدوته*:طيب دا بقى ياستي كان ابن اغني واحد عندنا في الحتة
اه كان ابن بتاع الطعمية لا وايه كان بيغيظ العيال كلها.
كلنا نبقى جايبين شاندوتش طعمية واحد وهو معاه اتنين _
كونوز:امممممممم شاندوتش وطعمية !!! . وقعدت تفكر
موروز:اه امال ايه,يالهوك ياتيتوز بقى انت اختفيت من تحت وطلعت هنا
,ليلتك بني مشجر .
كونوز:بني مشجر كمان!!!!!!
وهي مكشرة تاني:موروز ممكن براحة عليا شوية عشان افهم لغتك دي
موروز في سره*هو انا بتكلم فرنساوي ياولاد*
ااااااااه الرقة ليها ناسها برضوا
كونوز:امممممممم طب تيجي تتكلم معاه هو اكيد راح النادي
دا معاد التدريب بتاعه
موروز:والله واتنجرنا وبقينا بنروح نوادي يا ولاه
وديني وماله
وراحوا الاتنين وهناك اول ماتيتوز شافه بدأ يتهرب بس على مين
كونوز:تعالي ياتيتوز اعرفك على صاحبي موروز دا عسول اوي
تيتوز (وشه جاب الوان):لالالا اصلي مشغول ياكونوز بعدين بقى
موروز طبعا مش هيسكت هجم وقال:تيتوز بالشطة والليمون
ازيك ياض اخبار الحراق معاك ايه
تيتوز:انت تعرفني منين ياأخ انت
موروز:عيب عليك ياض ,هتتهرب مني انا كان غيرك اشطر ياأمور\
تيتوز:الله هي تلاقيح جتت ماتحل عننا يابني
اوبااااااا اخينا بدأ يقع ويبان على حقيقته .
وكونوز ياعيني متنحة وبتفكروعمالة تكلم نفسها* تلاقيح جتت* كل دي كلمة
موروز:يابني مش على موروز يغرك الطعمية والخرابات المستخبية والذي منه
كونوز مش فاهمة حاجة في اي حاجة
تيتوز :اللهم طولك ياروح
موروز:جري ايه ياض ,نسيت ابوك اللي كان بيعمل الطعمية
في زيت معششة فيه كل مخلوقات ربك الزاحفة والطايرة
تيتوز:جري ايه ياض وانت ابوك يعني اللي كان ميه ميه

واخينا بدأ يقع ويبان على حقيقته
وكونوز مش مصدقة الكلام اللي بتسمعه
موروز:ياعيني عليك ياموروز حريف من يومك ياض تفوت في الحديد
وتعرف الكفت ,خمسة عليك- فلة عليك,خمسة عليك -فلة عليك
وكونوز عمالة تضحك على حركات موروز اللي بيعملها يايديه ورجليه
والكلام الغريب اللي بيغنيه
وقال:يعني طلعتوا اصحاب اوي كمان
تيتوز :منك لله ولساه ابيضاني وحلوية من يومك ياموروز
موروز:وصلتم لهنا ازاي ياض,بين يوم وليلة كدة
تيتوز:اه ياعم مش ابويا كان بيكد ويتعب من يومه
موروز:اه في الزيت المحروق ههههههههه عليا انا ياتيتوز والله عال

(ودي صورة من الصور اللي منتشرة حوالينا بس اكيد بكرة هتبقى اكتر واكتر الف مرة
ناس بين يوم وليلة بتطلع من سابع ارض لسابع سما
ولا حد بيسألهم ازاي ولا منين والوسايل ياااااااااما
كتيرة من غير تعب ولا كد
لا ومش بس غنى من غير حد لا دا كمان
غرورو وتكبر على ناس كانوا وسطهم في يوم من الايام
بس دا طبيعي لناس اغتنيت وكسبت مال على حساب دم الغلابة والمساكين مصوا دمهم واكلوا لحمهم). وخلص الحوار بين كونوز وموروز وتيتوز وقال
موروز :انا مروح بقى
وطلبت كونوز من الروبوت بتاعها يوصل موروز بالسوبر سونيك كار
وطبعا اخينا لما سمع كدة بدأ يجهز ريشه عشان ينفشه
قدام العيال اول ما يدخل حتتهم
وبعد ما مشي موروز خطر على بال كونوز حاجة مهمة اوى بالنسبة ليها!!!!!!!!!؟؟؟؟؟؟؟؟؟؟؟

كونوز وموروز (الحلقه التالته )

وافتكر موروز القلم وطبعا كان هيموت دا كان سالفة من الاسطي اللي كان بيشتغل عنده

وكان واعده يرجهوله اخر السنة

وطبعا مش نام طول الليل عشان كان هيموت عالقلم

موروز في سره:كان يوم اسود يوم ما كلمتني,هجيب القلم ازاي دلوقتي؟

وجه تاني يوم واتجمعوا تاني في المدرسة وطبعا اخينا قاعد طول اليوم من غير قلم

كان عنده أمل انها تفتكر وتديهوله

وكونوز شغالة كتابة الله ينور بقلمها الجديد اللي يجنن ونسيت قلم موروز في البيت

وفي اخر اليوم موروز اخيرا قرر انه يقولها

موروز:امبارح رجعت اكلمك بعد ما ركبتي العربية بتاعتك لقيتك طيرتى

كونوز:اممممممممممم ليه كان في حاجة

موروز:اه بصراحة بقى كنت عاوز القلم بتاعي

وبصوت واطي (او ممكن اخد قلمك الجامد ده وكتمي انتي على التاني)

كونوز احمرت وانكسفت اوي لان القلم مش معاها

كونوز:هو دا قلم اصله كان متاكل اوي وصغير اوييييي فأنا افتكرته خلص وسبته في البيت

موروز اول ما سمع كدة كان هيغمي عليه

موروز:ايه الافترا والتبذير ده انتي جيبك مخروم ولا ايه

دا الاسطي شاريه من سنتين بس

كونوز كانت مندهشة من اللي موروز عاملة عالقلم

كونوز:طب خلاص بعد ما نخلص تعالي معايا اديهولك

موروز برق عنيه اكتر ماهو وقال:اجي معاكي فين

كونوز :بيتي

موروز:لا صحيح طب وماله

وبعد ما اليوم خلص

كونوز:يلا ياموروز عشان تيجي تاخد القلم اللي الاسطي شارية من سنتين

واخدت كونوز موروز معاها في السوبر سونيك كار

واخينا طبعا مش مصدق نفسه عنيه كانت هتطلع برا من كتير التبريق

وياسلام بقى لما راح عندها الواد جاله صدمة عصبية مش مصدق

ان دول من البشر زيهم بياكلوا ويشربوا زيهم وعايشين معاهم على كوكو الارض

فرجته كونوز على فيلتها وهم عايشين في خرابة

وعلى اوضتها وهم كلهم بيناموا في مكان واحد على قش او حصر مليناة حشرات

وعلى لعبها وهم اصلا مش عندهم حاجة اسمها لعب طول النهار طحن وبس

اكلته بسكويت وشوكولاته وهم يوم ما يقولوا أكلوا كويس يبقى طعمية معاها بتنجان

يوم ما تحس بالحر تشغل التكييف

وهو اخره يعمل مروحة من الورق ويهوي بيها

ويوم ماتحس بالبرد تلبس الفرو بتاعها وتستغطي بميت بطانية

وهو يقعد في وسط اصحابه ويكربسوا فوق بعض يمكن يحسوا بدفا

يوم ما يقول الاشية معدن يبقى معاه بدل الربع جنيه نص جنيه

وهي يوم ماتقول انا كسبت ياما يبقى معاها بدل المليون فهرليون

كل دا موروز عمال يفكر فيه وهو ماشي بيتفرج على الفيلات وناطحات السحاب اللي حواليه

وفجأة وهو ماشي برق اكتر واكتر لما سمع حد بيقول

هااااااااااااي كونوز

ياتري مين ده وموروز ذهل ليه لما شافه؟؟؟؟؟؟؟؟؟

هنعرف الحلقة الجاية

كـــونوز و مـــورز (الحلقه التانيه )

الحلقه التانيه
وقبل ماكونوز وموروز يدخلوا المدرسه نبص عليها من بره
ونوصفها وصف ثلاثى الابعاد بس لاسف مفيش ابعاد
عباره عن نص مبنى فيه 3 فصول وكل فصل فيه يجى فهرليون طالب
ومفيش سور جنب المدرسه (قبلى وبحرى فى نفس الوقت)
وياسلام بقى عالعلم عباره عن ورقه ممضيه من كل الاجيال وملزوقه على عمود مش موجود
نيجى لموروز اللى يا عينى بيحوش بقاله 3 شهور عشان يروح المدرسه بالتوك توك ... طبعا عشان هو عفريت الحته والعيال كلهم واخدينه قدوه
وهو نازل من الفجر عشان يلحق معاد المدرسه
عدى على عم تؤتؤ وظبطله سندوتش الطعميه لزوم اول يوم مدرسه
وفى نفس الوقت كانت كونوز طايره بالسوبر سونيك كار وفى شنطتها اكلت الكريب اللى بتحبها
وفى ثانيه كانت فى المدرسه
وتعالوا نشوف نظراتهم وكلامهم فى سرهم كان عامل ازاى
موروز : كل دى عيال ربنا يستر واعرف انفش ريشى بالمعلوم اللى اخدته من فحت امبارح
كونوز بكل اذبهلال
كونوز:ممممممممم دا شكله اوحش من اللى شفته فى النونوفزيون
وموروز عمال يبص حواليه كل الوشوش زى بعضها تسد النفس
وعينيه رايحه جايه وفجأه اتسمر

موروز : لا لا لا لا مش معقول دى زينا دى ولا حاجه تانيه دى جايه منين دى يا عيال

كونوز: ممممممممممم الجو حر اوى اى اى يا رجلى هقعد فين

وعين موروز فضلت عليها ورجله فضلت ماشيه لحد ما قرب منها
موروز: يالهوى يانى ايه البت القمر دى هيا جات غلط هنا ولا ايه

ومن لزقه موروز لكونوز اخدت بالها منه

كونوز : يااااااااااه ايه الولد دا بيبصلى كدا ليه دا شكله غريب اوى
وشعره واقف ايه دا هو بيعمل بعنيه كدا ليه
هو مش غاسل وشه ولا ايه

موروز : هى دى الواحد ممكن يكلمها ولا يبص بس
كونوز : انا تعبت بقى
واخيرا كونوز اخدت القرار انها تسال حد على مكان الفصل ومفيش قدامها غير موروز
كونوز : هو فين الكلاس بليييز
موروز : نعم !!!!!!!!!!!!!!!!!!!!!!!!!!
كونوز : الكلاس يعنى هنروح فين.
موروز : اه اه الفصل يعنى اه هو هناك !!!!!!!!!!!
كونوز : طب يلا نروح
موروز : نعم !!!!!!.. اه من عنيا
وخدها وراحوا الفصل وقعدها فى اول بنش
كونوز : ميرسى
موروز : يالهوك لا شكر على واجب انتى بتقولى ايه
وبدأ اليوم الدراسى وكونوز لقت كل الناس ماسكه قلم وورقه وهى مش معاها غير اللاب بتاعها
وطبعا راحت لصاحبها الوحيد تتطلب من قلم
وهو مش معاه غيره لكن هيقول ايه اداهولها طبعا
وفى اخر اليوم مشيوا سوا ولقت الروبوت بتاعها مستنيها عشان يوصلها للعربيه
وطبعا اخينا متنح وفضل ماشى وراها لحد ما شاف السوبر سونيك كار
موروز: وانا اللى جاى بالتوك توك ونافش ريشى
كونوز : باااااااى
موروز :استنى !! هو انتى بيقولوك يا ايه
كونوز :بضحكه رقيقه زيها - كونوز-
موروز :عاشت الاسامى وانا موروز
ويادوب لف وافتكر حاجه مهمه رجع تانى لقى السوبر كار اختفت
يا ترى افتكر ايه؟؟؟؟؟؟؟؟؟؟
الحلقه الجايه.

كــــونــوز و مـــوروز

بسم الله الرحمن الرحيم



في ظل تقلبات العصر القادم واختفاء معظم الشهب والنيازك وذوبان اغلب طبقات الارض
لاحظنا نحن H2W وجود فجوه بين من يسكنوا فوق القمر ومن يسكنوا تحت التراب...

لذا سنحاول في هذا الموضوع ان نعيد التحام المجتمع بعد انتهاء الطبقه المتوسطه..
ونتخيل صراعا يدور بين قانطي ناطحات السحاب وقانطي الخراب ..
ولنذهب سريعا الي عام 2080
حيث يبدا الصراع بين كونوز تلك البنوته الرقيقه تسكن في فيلا انيقه تطل علي احد جبال فنتوش علي سطح القمر
وبين موروز ذلك الولد المتهتك تحت البراكين لايري منه سوي دخان شعر راسه الذي يستخدم كعامل انذار عند حدوث احد الكوارث

تبدأ كونوز يومها بجذب المغناطيس من سريرها (الملزوق فيه)..
وتنطلق الي عالمها تكون هي وحدها صاحبه القرار
في حين ان موروز يستيقظ هلعا علي صوت الزلازل التي تدفعه للانصهار في الحياه ومشاهدتها بعين من نار..

***************************************
وقوام قوام جه وقت الصحيان
وجه روبوت صغنون قعد يزغزغ فى كونوز عشان تقوم من النوم وصحيت كونوز من النوم
وصوت ضحكنها دا احلى ضحكه ممكن تسمعها
وقامت كونوز تغسل وشها- الناس دى صحيح نضيفه وبتبرق على طول مش محتاجه غسيل وش - بس الاحتياط واجب برضو يمكن ذره تراب كدا ولا كدا
نسيت نفسها ووقعت على وش كونوز
وجه وقت الفطار قررت كونوز انها تتفرج عالنونو فزيون وهى بتفطر (دا تلفزيون مخصوص صمموه مخصوص للاطفال)
وشافت كونوز حاجات غريبه عجيبه
شافت ناس بيقولوا عليهم فقرا الناس دول كانوا بياكلوا اكل غريب وبيقولوا كلام مريب وبيلبسوا لبس عجيب
كونز متعرفش الناس دى كونوز متعرفش غير باباى وماماى واصحابها فى النادى وبس
ودخلت ماماى تتطمن على كونوز زى كل يوم
((جود مورنينج كونوز))
((جود مورنينج ماماى))
((ها يا كونوز فكرتى واخترتى مدرستك يا امورتى))
كونوز بكل لهفه (( اه ياماماى انا عايزه اروح مدرسه بتاع الفقرا بليييييز يا ماماى دول بياكلوا سندوتشات فول ايه فول دا يا ماماى وكمان بيقولوا كلام غريب ايه الكلام دا يا مامى
وبيلبسوا بيلبسوا لبس غريب....وو و كمان......)
الام بتقاطع كونوز
(( كونوز انتى جبتى الكلام دا منين لا طبعا مش فى حاجه اسمها مدراس فقرا كونوز مش ينفع تدخل مدراس فقرا))
كونوز وهى بتعيط وبصوت عالى
((يا ماماى بليييييييييييييز))
وطبعا لان كونوز دلوعه وزنانه زى كل الاطفال اضطرت ماماى انها توافق على حكايه مدرسه الفقرا دى مؤقتا

*********************************************

ونطير بسرعه علي موروز ومن غير ما نوصف الاحوال ...الحديده مكحوته وكله عال العال ..
وبعدين كفايه عليهم الخرابه وعم تؤتؤ البقال ..خلاصه الكلام..

طلع النهار وصحي موروز من نومه على صوت التكاتك والعفاريت بتتنطط قدام وشه كالعادة
وبعلو صوته....
موروز:في فطارياحاجة ولا زي كل يوم
الحاجة (الام يعني):كل يوم نفس السؤال ماقولنا زي كل يوم يلا روح لقطلك اي حاجة منه هنا ولا هناك
موروز:يوووووووة,امتى بقى هنلاقي لقمة ناكلها في خرابتنا دي
الام:ايوة ابدأ الفيلم بتاع كل يوم ,ربنا يخلصني منكم
موروز:خلاص ياحاجة,خلينا في المهم ,جبتي لبس المدرسة؟
الام:ال مدرسة ال,فالح انت اوي عشان تفلح في العلام
موروز:ايه أخرة الحوار بتاعك ده,مش قولنا دي دماغي وهعمل اللي انا عايزة
الام:طب ياخوي انت حر انا مالي,اخره انا اخترتلك يافطتين من بتوع الانتخابات
انما ايه لقطة ولونهم لون لبس المدرسة وادتهم لاسطي سوسته يظبطهملك
موروز:امممممم طيب امال فين الحاج
الام:قاعد في المخروبة(القهوة يعني)
موروز:ربنا يسهل ويخلصني هو كمان
وراح موروز المخروبة
موروز:صباحك منعكش ياحاج
الاب:اهلا ياخوي عايز ايه ع الصبح
موروز:ماأنت عارف هاعوز ايه يعني,المدرسة بكرة
الاب:طب وانا مالي ,حد قالك انى عايز اتعلم
موروز:لا ياحاج(اللهم طولك ياروح)خلاصة الحوار هات المعلوم
اللي هاظبط نفسي بيه بكرة
الاب:واجيبلك منين ان شاء الله ,شايفني خزنة ولا ايه
موروز:وانا عمري شوفت الخزنة في حياتي,مش هاخلص بقى
الاب:روح ياخوي لقط رزقك في اي حتى انهارده وخده معاك بكرة,هي جديدة عليك يعني
موروز:عاااااااااارف, هو دا اللي بناخده منكم

فعلا مبيجيش من العيال غير وجع الدماغ ...

وجه تاني يوم والكل اخر استعداد ...و و و


وتابعونا الحلقه الجايه ان شاء الله ...

بدايه وبطاقه ترشيح

بسم الله الرحمن الرحيم

اهلا بيكم في بلوجنا المتواضع ..ويارب دايما تنوره بمشاركاتكم ..

اكيد طبعا معظمكم يعرفنا ..بس احنا حبينا ننزل البوست ده نبتدي فيه الحكايه من الاول ..

بدايه تعارفنا كانت في اول سنه كليه ..هنوده اتعرفت علي فوفا علي المحطه وراحت الكليه لقتها معاها في نفس السكشن ..

وبما اننا اسامينا متقاربه ..فحصلت صدفه جميله ..اتلخبط بطاقه الترشيح بتاعت هنوده مع نودي في اخر السكشن..

ومن محاسن الصدف ان نودي تتطلع مع فوفا في نفس الباص اللي بيروح الكليه ..ومن هنا ابتدت الحكايه ..

عملنا رمز لينا جمعنا فيه اسامينا ونزلناه في اول موضوع لينا ..ان شاء الله هنعرضه قريب علي البلوج..

رمزنا هو H2W وحاولنا نحط لنفسنا اهداف معينه نمشي عليها ..

والسبب الرئيسي حال الدنيا اللي مش عاجبنا ولقينا اتفقنا علي سلبيات وده واضح لان شخصيتنا متقاربه وصحوبيتنا جامده
وابتدي بموضوع حياه عايشينها وحياه عايزينها ...وربنا يقدرنا ونكمل المشواااار ,,

انتظرونا دايما باجدد مواضيعنا هنا علي البلوج ..وربنا يقدرنا ونفضل عند حسن ظنكم ..
فائق احترامنا وتقديرنا ..والسلام خير ختاااااااام ..

H2W