ذكريات حلوه لايام مش حلوه

كلها كام يوم وتبدء الامتحانات وترجع الايام اللى ما يعلم بيها الا ربنا
بيبقى الليل فيها شبه النهار وبنتحول الى كائنات اشكالها غريبه وعنيها حمرا
من كتر الورق اللى احولينا خلاص من كتر المذاكره فيه ليل ونهار مذاكره لاكتر من شهر
واليوم اللى بنريحه بيبقى يوم الامتحان :(

بس احلى حاجه فالايام دى بجد لمتنا ومذاكرتنا مع بعض هو صحيح بقالنا يجى سنتين مش بنتجمع عشان
نذاكر زى زمان بس كانت احلى ايام
لما كنا بنروح عند هنوده كنا بنروح ناكل مش نذاكر : D
بسكوت بالنيسون ووو محوجه وكان فى بتاع كدا يا هنوده طريه وعليها سكر من فوق بس مش فاكره اسمها :D
وبيتزا وحاجات كتير من كتر ما هى غريبه مش فاكره اسمها
بس الفطار عند هنوده مختلف جدا عمرها ما قدمتلنا عالفطار حاجه كدا زى اللى الناس العاديين بيفطروا منها فول وجنبه والحاجات التقليديه دى
حتى مشروبات هنوده مختلفه افتكر اكتر حاجه عجبتنى بجد عصير الخوخ نفسى اروح عندها وتعملهولى تانى
بس فى موسم الخوخ بقى
واحلى حاجه العك اللى كنا بنعمله بصراحه مش قادره اقول عليه مذاكره :D
كنا بنقضى نص الوقت هزار وكلام فى كل حاجه وكل واحده بموقف حصل وبكلمه اتقالت
مذاكره بنات بقى

ولما كنا بنروح عند فوفا كنا بنقلب البيت من كتر الضحك والهزار
على فكره احنا كنا بنضحك من كتر ما احنا مش فاهمين حاجه ماللى بنذاكره

ياريتها فضلت لمتنا اللى مكناش بنفهم منها حاجه دى

وحشونى ( الذكرى الرابعه)

كل سنه وانتم طيبين احنا فى رمضان واكيد عندى ذكريات فيه كتيره
بس اللى مش بقدر انساه دايما اول موضوع كتبناه مع بعض H २ W
كان اسمه حياه عايشنها وحياه عايزنها وفاكره بعدها الموضوعات اللى كتبناها والتشجيع اللى شوفناه
وكونوز وموروز ولادنا اللى ليهم جزء تانى بس منزلش كل دا مش من زمان اوى دا من اربع سنين بالظبط
عنوان الموضوع بايخ انا عارفه كان نفسى اختار حاجه دمها خفيف زى مواضيعنا اللى كنا بنكتبها
بس حتى خفه الدم دلوقتى بقت برضو ذكرى زى مواضيعنا اللى نسيناها و
.الايام الحلوه اللى مبقناش حتى بنعرف نقعد مع بعض
ساعه كامله بعد ما كنا بنقضى طول النهار مع بعض فى الكليه وبالليل بنكون عالنت بنتكلم ونهزر
ودلوقتى ممكن نعرف اخبار عن بعض بالصدفه
اكيد كان هيجى اليوم اللى كنا هنتشغل فيه ومش هنعرف نقعد مع بعض بس دا جه بدرى اوى
انا كنت متوقعاه هيجى بعد ما كل واحده فينا يبقى عندها اربع عيال مطلعين عنينها بس دا جه واحنا لسه داخلين سنه رابعه

دا دليل اننا بعد ما نتخرج باربع سنين هننسى حتى اسامى بعض ومش هيبقى معانا ارقام تليفونات لبعض
انا خلاص كرهت رقم اربعه بعد الموضوع النكد دا : D
بس على فكره عمرى ما بنساكم مهما كانت الظروف
وعمرى ما هنساكم حتى لو جبت الاربع عيال : D

ونجحنا والله نجحنا !

بسم الله الرحمن الرحيم

زي ما وعدتكم الأجازة اللي فاتت إني اكتب بوست النتيجة

لانها طبعا مش أي نتيجة دي سنة تالتة صيدلة وبرضو مش اي صيدلة :D

المهم اننا نجحنا وفرحنا واترحمنا من عذاب سنة كاملة

طلعلنا فيها انقلونزا الخنازير في الترم الاول

والترم التاني كنا بنمتحن مادة كل يومين

ودا طبعا حدث تاريخي اطاح بآمال الطلبة في ابسط حقوق النجاح

الحمدلله إن السنة دي خلاص عدت

وعدت معاها ذكريات جميلة في المعامل وسط الفئران والضفادع

وفاضل سنة ونتخرج بقي وأكيد ساعتها هابقي اقول:

ياريت الدراسة ترجع تاني وده علي طوول حالنا

كل ما نعدي خطوة نقول ياريتنا نرجع تاني صغيرين :D

معلش طولت عليكم متنسوش الكانز وانتوا ماشين :P

:: متمردةٌ هيَ ::

بسم الله الرحمن الرحيم

لم أسطتع قط تفسير تلك النظرة ..
كلما تراني والدتها تنظر إليّ - بعينين غائرتين - نظرة قاتمة ..لا أدري هل تنظر نفس النظرة لباقي أصدقائنا ؟؟
أم هي لي وحدي حيث كنت الصديقة المقربة لابنتها ؟!
بدأت المغامرة في الصف الرابع الابتدائي ..عندما أُجبرت علي النقل من فصل والدتي إلي فصل آخر لا أعلم فيه أحد
جلست بجانبي فتاة يبدو عليها الهدوء كانت تدعي " هالة " وكنت أحسبها كذلك ..
وطالت الجلسة ما يقارب السبع سنوات ..( لم أدرك ذلك إلا الآن :( ).
بدات تسألني " علي الدرس اللي بروح فيه " علي سبيل المقارنة ..فأخبرتها علي مكانة ..وبالفعل كانت معي في غضون أسبوع
بدأت اشعر أنها تلاحقني ..وبالتعود أصبحت أراها يومياً في المدرسة وفي الدرس ..وأخيرا عرفت أنها تبعد عن مسكني فقط بشوارع قليلة ..
كانت غيورة جداً ..لم أكن أعرف هذا ..فقط والدتها هي من أخبرتني ..وكانت تستحثني علي المذاكرة لانها تعلم إن ابنتها ستسارع بالمذاكرة
لتتفوق عليّ ..وهكذا كنا في الظاهر ...للأسف كانت تفعل المستحيل حتي تتفوق علي بطرق مشرووعة وغير مشروعة ..حتي لو بنصف درجة...حقيقة لم أكن أشعر بهذا منها ...!!
حتي التحقنا بالمدرسة الاعدادية ..تخيلت وقتها أنني سأبدء حياة جديده ولكني فوجئت باتصال هاتفي منها تخبرني أنها التحقت بنفس الدرس الذي التحقت به ..وبالطبع سنكون في صف واحد في مدرسة واحدة ..لم أدري لماذا فرحت حين ابلغتني ..يبدو إنني كنت أحبها في ذاك الوقت
لا أدري ...فوجئت ونحن في طريقنا للدرس أنها تنزف دماً..سألتها عن ذلك ؟...أجابت في سرعة " ده قلم أحمر وقع علي ايدي " ..الحمد لله كنت أفرق جيداً بين الدم وحبر القلم !!..وعلي غرة منها ..نزعت المنديل من يديها ..فإذا بالدم يغمر يدي !!..قامت تلك المجنونة بتقطيع شراين يديها اليسري ..كدت أفقد الوعي من منظر الدم ..ولكنها هي من فعل ذلك أولاً.:(

كنا علي مقربة من الدرس ..واستنجدت بأحد المدرسين الذي سرعان ما أسعفها ونقلها إلي المستشفي ..بعدما أفاقت عرفت من والدتها أنها رفضت لها طلباً بسيطا ..فدخلت غرفتها وفعلت فعلتها وخرجت ..وعرفت أنها لم تكن المرة الأولي ..وبالطبع لم تكن الاخيرة ..!!

نهرتها بشدة ..وهددتها لو فعلت ذلك مرة أخري فلن أذهب معها المدرسة ..وكان ذلك حقا عقاب رادع لها ..ومرت 3 سنوات لا أتذكر منها
الكثير ..ولكنها كانت حياة مليئة بالشجار والغيرة وأحياناً الافتراق لعدة شهور ..ثم الرجوع ... حياة مثيرة بالطبع :(..!

وبعد الالتحاق بالمدرسة الثانوية ..اجريت نفس المكالمة التليفونية - الغريب في الأمر أنني مازلت أحفظ رقم التليفون الخاص بها - ووجدتها معي في الدرس ..ولكني كنت قد تعرفت علي المزيد من الاصدقاء ...فكانت تجلس وحدها ..وصادقت "شلة وحشة " علي حد تعبيرها
نعم كانت تعرف أنهم أصدقاء سوء ..ورغم ذلك كانت تخرج معهم ...وتركت مصاحبتي ..ولكنها كانت تأتي كل فترة تحكي لي علي مغامراتها مع الشباب ..وكيف أنها تعلمت كذاوكذا ..ولا تتحرج أبداً من قول هذا ..رغم انني كنت اوبخها بشده .وقضيت فرتة كبيرة أساعدها علي المذاكرة مرة أخري ..ولكنها أعجبتها حياتها الجديدة ...كانت تقول لي " أنتِ البنت الوحيدة وأكيد كل طلباتك أوامر " في الواقع لم أكن كذلك ..ولكن عرفت مؤخراً .." دي بتمشي كلامها علي ابوها كمان !!" علي حد تعبير والدتها التي احتارت في أمرها وبلغت شكوكها أقصاها..وبسبب تمردها قام المسؤل عن الدرس بطردها منه ...ولكنها لم تعبأ به ..بل وألقنته درساً لن ينساه ..بدأت اتحرج منها واختلق الاعذار عندما أقابلها صدفة في الشارع ..ومرة وجدتها مربوطة الايدي ..اعترفت لي أن والدها وبخها بسبب خروجاتها المستمرة فقطعت شراينيها والاربطه .." وعملت عملية كبيييرة أوي ..والدكتور عمل بابا محضر عشان ده كان انتحار وأنا لسه قاصر ..." علي حد تعبيرها .
هنا شعرت بالذنب تجاهها..هل أنا السبب ؟
هل كنت حقا أخفف عنها عندما كانت تخطأ وتأتي معترفة بخطأها ؟
وانقطعت أخبارها عني ..وحتي الآن رأيتها مرة واحدة خلال الاربع أعوام الماضية ..وعرفت أناه التحقت بكلية الآداب
ومنها الي الحقوق ..ومنها الي معهد ما ...وكانت تنوي السفر خارج المدينة ..
وكلما أري والدتها ..أشعر بالضيق ..تقول لي " إذيك يا دكتورة هند " ..وتبكي ..
واليوم رأيتها ..لم يكن هناك الوقت الكافي لأبتسم حتي في وجهها ..ولكنها نظرت إلي نظره أفزعتني ...وانتهت بي إلي كتابة هذا البوست :(
ت م ت

::نونيه القحطاني ::

درة يتيمه
قوة في معانيها
وسلامة مبانيها
وروعة قوافيها
وكثرة علومها
وغزارة علمها

يقول في مطلعها :

يا منـزل الآيـات والفرقـان *** بيني وبينـك حرمـة القـرآن
إشرح به صدري لمعرفة الهدى *** واعصم به قلبي من الشيطـان
يسر به أمري وأقض مآربـي *** وأجر به جسدي مـن النيـران

ويقول في نهاية القصيدة:

أنا تمرة الأحباب حنظلة العـدا *** أنا غصة في حلق من عادانـي
وأنا المحب لأهل سنـة أحمـد *** وأنا الأديب الشاعر القحطانـي
سل عن بني قحطان كيف فعالهم *** يوم الهياج إذا التقـى الزحفـان
سل كيف نثرهم الكلام ونظمهـم *** وهـا لهـم سيفـان مسلـولان
نصـروا بألسنـة حـداد سلـق *** مثل الأسنـة شرعـت لطعـان
سل عنهم عند الجدال إذا التقـى *** منهم ومن أضدادهـم خصمـان

****
وأنا الـذي حبرتهـا وجعلتهـا *** منظومـة كقلائـد المـرجـان
ونصرت أهل الحق مبلغ طاقتي *** وصفعت كل مخالـف صفعـان
مع أنها جمعـت علومـا جمـة *** مما يضيـق لشرحهـا ديوانـي
أبياتها مثـل الحدائـق تجتنـى *** سمعا وليـس يملهـن الجانـي
وكأن رسم سطورها في طرسها *** وشـي تنمقـه أكـف غوانـي
والله أسألـه قبـول قصيدتـي *** منـي وأشكـره لمـا أولانـي
صلى الإله على النبـي محمـد *** ما ناح قمري علـى الأغصـان
وعلى جميـع بناتـه ونسائـه *** وعلى جميع الصحب والإخـوان
بالله قولـوا كلـمـا أنشـدتـم *** رحم الإله صداك يـا قحطانـي!!


كانت تلك مقتطفات بسيطه جدا من تلك الرائعه
ولتمام الاستمتاع بها اليكم ..
القصيده كامله
بصوت القارئ
فــــارس عـــــبــــاد

http://www.mojama.net/new/sound.php?do=viewsound&ids=708

تستاهل التحميل :)
بصراحة لاأمل من تكرار سماعها :D

راجعين ..!!

وانقسم الطلاب..!

منهم من يتمني رجوع الدراسه ومنهم من يحمد الله علي التأجيل و انفلونزا الخنازير

أنا كنت مأيده التأجيل ...بس فعلا حسيت بالحنين للكليه ..معرفش ليه ؟ رغم انها سنه تالته :(

وكمان حنيت أكتب في البلوج زي الاول ...وأتأكدت ان البعد بيعلم الشوق .

تقريبا انقضي الاسبوع الاول من بدء الدراسه ..ولسه عايشين في الاجازه .

او هو شعور رااائع ان الشغل لسه في أوله مع الاستمتاع بالصحبه الجميله اللي افتقدناها طول فتره الاجازه

نفسي كمان اجتاز السنه دي بدون خساير انا وكل اصحابي والدفعه كمان لو أمكن ذلك :D

وان شاء الله اكتب بوست التهنئه بتاع النجاح علي اخر السنه .._أتمني ذلك _

وربنا مع الجميع

هنوده :D

استــغاثه كوكــتيل !!

ذات مساء مليء بالضوضاء يبدو وكان هناك حفل زفاف في منزل جارنا العزيز ..فاتجهت إلي احدي شرفات المنزل
لأري مظاهر الفرح التي سرعان ما تتحول إلي " ضرب نار"
وكعادتي كلما دخلت الشرفة أطالع منظر العصافير والبلابل التي تعلو وتهبط علي قضبان السكة الحديد
في لحظه دخولي وجدت حركه غير عاديه ..شاهدتهم يسيروا في مدارات مختلفة ومتداخلة ..فاستدارت عيني في المكان تبحث عن سبب الانقلاب فلم أجد شيئا
وجال بخاطري انها وسيله لتسجيل اعتراضهم علي هذا الضجيج ..وفجاه لاح أمام عيني لونا فسفوريا غير ذلك الرمادي المعتاد ..فسرعان ما تبين انه عصفور آخر
له رأس صفراء ورقبه برتقالية وجسم اخضر اللون فأدركت حينها لماذا كانت تلك الحركة غير العادية من البلابل الاخري ....وجدت ذلك العصفور الفسفوري يجري
أمامهم ويقفز من مكان لآخر بكل حيوية ونشاط وكأنه يتراقص علي الأنغام الصادرة من حفل الزفاف ..وكم تمنيت أن أكون بالقرب منه أشاطره أفراحه وحريته
وأيضا كي أتبين من نوعيته فالظلام بدا يحل وبالكاد تري كتله من الألوان تقفز من مكان لمكان ..وبينما أنا مستغرقة في تأملاتي إذا بوالدي يأتي من خلفي وكأنه
يستنكر انتظاري الطويل مع هذا الضوضاء المزعج وقبل أن ينبس ببنت شفه أشرت له علي مكان ذلك العصفور الفسفوري فابتسم والدي واخبرني انه ليس من
الضروري أن يكون عصفورا . نسيت أن أخبركم أن والدي له باع طويل في تربيه عصافير الزينة ..ودّعت العصفور وهممت بالدخول حتى لا أصاب بصداع
يهشم رأسي وأصدقكم القول لقد تمنيت أن ابقي لمتابعه ذلك العصفور وموقف العصافير الاخري منه ,ولكنها أصبحت الآن أراده والدي في الهروب من الصداع
ودخلت الغرفة وهممت بـــ...

" هـــــنـــــد ..هنــــــد " انخلع قلبي لهذا النداء فصوت والدي كان يوحي بحدوث كارثة كبري كانت خطوه واحده وأصبحت في الشرفة مره أخري لأجد والدي يشير
إلي منظر ينفطر له القلب ..
جرت إحدى القطط الضالة إلي عصفوري الجميل علي غفلة منه أمسكته بأنيابها وهنا كدت أجن عندما رأيت قطه أخري تجري وتخطف العصفور من فم الأولي
وكأنها وليمه يتصارعون من اجلها وهو ينتهز فرصه للفرار منهما وشعرت بصوت استغاثته تعلو فوق ضجيج الفرح وكلما ينفلت من احدهما تسحبه الاخري .لم
استطع الانتظار فعما قريب سيخرج قطيع من القطط الضالة ويمزقونه عن آخره ..فناديت بأعلى صوتي علي أخي الصغير وطلبت منه أن يذهب ليخلص ذلك المسكين
من الموت المحقق وها هو آخي يجري وراءها وهي تحمله بين أنيابها ولم تتركه إلا عندما أدركت أن هناك خطرا يقصدها يا لها من قطه حقيرة تسببت في خروج
الكثير من ذلك الريش الملون وراقبت أخي بقلب حائر تُري هل مازال علي قيد الحياة أم ...؟؟
مر وقت طووويل وفي الواقع لم يكن إلا بضع ثواني وكان أخي يحمله بين يديه مبتسما وهو يقول " صاحي صاحي "
وذهبت مع والدي لنتفحصه جيدا ..كانت أنفاسه تلاحقة وكأنه ينتفض من الخوف تلقاه والدي بحنان ولم يكن هناك أي آثار لجروح أو دماء .ولكن العصفور كان
في ذعر شديد وعيناه لا تكاد تنام لا ويفتحها بسرعة وكأنه يقاوم الموت وقال والدي انه نوع من انواع الببغاء له منقار الببغاء وجسم العصفور حقا تبارك
الخلاق ..
هو الآن يعيش في قفص أنيق ..مزود بالماء وبالحَب الذي يشتهيه ...والتقط الحب في نهم ..ولكنه مازال يرتعد واخشي أن يكون هناك كسر في احد أرجله الضعيفة
ولم أكن أتخيل انه سيبقي علي قيد الحياة بعد ما رأي الموت مراات عديدة.
وتغمرني الان سعاده بلا حدود ..لان الله جعلني سببا في انقاذ هذا الببغاء ...واصبحت اناديه كوكتيل لانه مزيج بين فصيلتين ولاني رايت معه الوانا من المشاعر
المتضاربه , حماك الله يا كوكتيلي العزيز!

:: كي لا ننسي ::

موضوعنا كى لاننسى مش بس اخوانا فى فلسطين..

كى لاننسى اخوانا فى كل مكان فى العراق ولبنان واى حد بيتعرض لظلم وقتل ودمار بلا ذنب..

دبابات ماشية في الشوارع والسلام ملو ش مكان والرصاص دا صوته عالى والشهدا فى كل مكان وفي صوت اعلى واعلى هز كيانى صوت ام شافت دم ابنها دم الشهيد ..

صوت طفل هايج اسروا ابوه هدموا بيته حرقوا لعبه وقتلوا اخوه ....

واتحول الشجر لرماده والزرع اتحصد قبل اوانه وارضه اتحولت بركان ..مات الضنى او اعتقل ..لطمت الام خدها غصب عنها عصت ربها وصرخت بعلو حسها ..

ورجعت تدعى ربها يلهمها الصبر ويطفى نار قلبها وحسرتها على ضناها اللى ضاع منها..

والاب اللى كان ثابت وصارم زى الجبل او الحديد الصوان جات النيران سيحته واتهد الجبل واتحول لكوم تراب والدموع نزلت على خده تجرى اللى كانت من زمان مبيشوفهاش هو نفسه مش بس اى انسان...

وشهيد فى غزة وجريح فى ضفة ولما بنسخن بتقوم مظاهرة ((ويا فلسطين احنا معاكى ليوم الدين)) واهو كلام والسلام

والكل بعدها بيروح بيته يتفرج علي المسلسلات والافلام ما هو عايش فى سلام ما هو عايش فى امان مش حاسس ان فى طفل فلسطينى نايم جعان..!

مقضى يومه بشمعة دا ان لقاها كمان ومفيش مدارس حتى الشوارع مليانه ضلمة وبرد قارص ..

ودا جزء بسيط من الماسى اللى بنشوفها كل يوم فى الجرايد والاعلام يمكن مش عايشنها معاهم بس احنا اكيد حسينا بمعانتهم والكلام دا مش جديد الكلام دا من سنين من 48

احنا عارفين اننا سمعنا الكلام دا كتيير وبنتاثر بيه بس مش لوقت طويل

وبنعيش حياتنا تانى وبننسى اخواتنا اللي بيموتوا بالملايين طب ازاى ننسى واحنا كل يوم بنصحى وننام على مشاهد ومناظر العدوان ..

ولااحنا ممكن نكون بنتناسى او اتعودنا او زى ما يكون مسلسل او فيلم اكشن متابعينه كل يوم..

وفى النهاية ندعو الله ان يكون النصر قريب وما ذلك على الله ببعيد

H 2 W


التوبيك ده كان قديم عندنا .. بس مناسب اوي للحاله اللي عايشينها دلوقتي
يارب يعجبكم ..

فرحه ثلاثيه الابعاد !!

بسم الله الرحمن الرحيم


كل سنه وانتوا طيبين بمناسبه عيد الأضحي

يارب دايما تكون ايامكم كلها اعياد

زيي كده مثلا ...عندي 3 اعياد في عيد واحد

بعد عيد الاضحي طبعا ..في عيد ميلاد اعز اتنين من اصحابي

طبعا عرفتوهم

هما حبايب قلبي



احلي اتنين في جروب H2W




fofa

nody



كل سنه وانتوا علي طول متجميعن

وعلي الخير متعاونين

وبجد الواحد بيبقي فخور بالجروب الجميل بتاعنا

ربنا يخليكوا ليا وميحرمناش ابدا من بعض

ونفضل دايما ايد واحده ..والحب دايما مجمعنا

**
وبأفضل كلامي اخط سلامي

HaNoDa

.......... اهلاوى ........ وزملكاوية...........

اعزائى المشاهدين معكم معلقكم الرياضى
ابو كوره لينقل لكم احداث مبارة القمة بين قطبى الكرة المصرية الاهلى والزمالك

اعزائى القراء معكم معلقكم الافتكاسى ابو العيال لينقل لكم احداث المعركة بين قطبى شقة الزوجية اهلاوى (الزوج) وزملكاوية (الزوجة) وابنهم مصراوى
ا
اهلاوى : يام العيال كوباية شاى احمر فالخمسينة خللينا نشجع بمزاج ( اهلى حديد)
زملكاوية : الزمالك سيحة يا اخويا ومفيش غير لبن بئى
اهلاوى : طب اعمليلى عصير فراوله باللبن
زملكاوية: مفيش فراولة اعملك سحلب
اهلاوى : اقولك مش عايز منك حاجه واتفضلى من هنا بئى عشان اتفرج عالماتش بمزاج
زملكاوية.: يا سلام مانا كمان عايزة اتفرج...........قاعدة على قلبك
ابو كورة : وابتدا الماتش والفرقتين جامدين جامدين سخنين سخنين .......وان شاء الله كسبانين


مصرواى : بابا هو مين اللى بيلعب

اهلاوى : الاهلى يا حبيبى وان شاء الله هيكسب
مصراوى :بابا هو بيلعب لوحده
اهلاوى : ايوه يا حبيبى اصل الفرقه اللى معاه دى ملهاش لزمة
زملكاوية: لا يا حبيبى الزمالك هو اللى بيلعب وان شاء الله هيكسب
مصراوى : ماما هو بيلعب لوحده
زملكاوية: ايوه يا حبيبى اصل الفرقه اللى معاه ملهاش لزمه

مصراوى : الله طب مين اللى بيلعب دلوقتى الاهلى ولا الزمالك

:ودبت خناقه والبيت ولع نار بين اهلاوى وزملكاوية ومصراوى تايه فالنص وفجأة
ابو كورة: وجوووووووووووول وجوووووووول وجوووووووووووول الاهلاويه اهم



مصراوى : هيييييييييييييه هيييييييييييييييه
اهلاوى : والاهلى عمهم وحابس دمهم

زملكاوية : ايه دا لاء دى اصلا تسلل
اهلاوى: اسكتى اسكتى متبوظليش دماغ الواد تسلل ايه يا شيخة

زملكاوية : طب ايه رايك بئى لو كسبتم مفيش غدا لمده اسبوع
اهلاوى : طب ايه رايك بئى لو انتم اللى كسبتم مفيش فلوس لمدة شهر
ابو العيال : البيت ولع نار تانى ومصراوى لسه تايه فالنص وفجأة
ابو كورة: وجووول وجووول وجووووووووووول هما دول الزملكاوية هو دا الشغل يا ولاد

مصراوى : هييييييييييييييه هييييييييييييييه
زملكاويه: يا زمالك ذلهم قطعهم كلهم
اهلاوى مين دول اللى يذلونا ................. اديله ميه اديله نار النادى الاهلى فريق جباار
زملكاوية : بس يا دمويين.................. لاتقولى صلصله ولا تقليه الزمالك ميه ميه
اهلاوى خليكى انتى كدا دماغك فالاكل والغسيل على طول
زملكاوية: وماله الغسيل يعنى.................. ابيض ابيض يا بلاش لون تانى غيره مينفعناش
مصراوى : هييييييييييييييييييه الماتش خلص ...........محله محله ........ اوه اووووه

H2W GROUP
NODY
FOFA

HANODA

دمـــــوع باســـــــــمه !!

هل تتبسم إذا اعتراك تجهم ؟!

أم تكتفي بالبكا فتري في عيون الناس الأدمع !

وكم أُحيط بك من الخطوب مالم تحسب

وكنت فيها كالفارس المتعثر

إن ضاقت بك الدنيا- فتكن وحيدا -هكذا تتوهم

ولكن من المحن ألوووف هيهات أن تعلم

فانظر لما حولك ترى إن كان لك أعين

أن الكل في ابتلاء والفوز لمن يصبر

فقاوم عراك نفسك وكن أنت المنتصر

وإن فقدت ما تملك فلا تبكي علي القدر

****

في انتظاركم

عيد ميلاد هنوده

انهارده عيد ميلاد اصغر واحده فى الجروب هنوده
عايزين نقولها حاجه صغيره
احنا بنحبك اوى ويارب نفضل دايما مع بعض
HAPPY BIRTH DAY
ويارب ايامك كلها سعيده

نودى& فوفا

يدوم التاج (نودى)

انا حاسه انى اكتر واحده مكنتش مخضوضه من التاج دا

مش عارفه ليه

1- بيقولون عليا هاديه ..... بس برىء والله

2- مش بحب التناكه والغلاسه والاستظراف تفضل البساطه

3- بحب السفر والخروج والتصوير والقطط و الايس كريم والشيكولاته والعنب

4- مش بحب اللى يمشى رايه وخلاص بحب التفاهم طبعا والحوار اللى اخرته مش خناقه طبعا

5- بحب الهزار جدا وبنسى نفسى خالص ساعتها

6- صريحة بس مش بحرج حد وجريئه شويه صغنينين

7- واثقه فى حاجتين افكارى وذوقى

8- بحب الكوره وزملكويه ونفسى اتعلم فيفا

9- مش بزعل بسرعه ولو حصل وزعلت مش بحب اكلم حد وبرجع تانى عادى مع نفسى

10- متروك لان فى حاجات كتير بتتحس ومش بتتقال

على فكره التاج طلع صعب فعلا انا جيت عند 5 ومش عرفت اكتب ايه بعد كدا

احنا بنمرر التاج ل
galilio

شمس الاحزان

وشوشة قلم

البنت المصريه

يدوم التاج ( هنوده)

طبعا من الصعب جدا ان الانسان يتكلم عن نفسه وخصوصا ان النفس البريه اكبر من اننا نحكيها فى 10 جمل

لكن هى محاوله لسرد بعض ما يراه الاخرين فى شخصيتى لان الانسان لما بيتكلم عن نفسه بيحاول يظهرها

فى احسن حال ولكنى هنا سالتزم الحياد وانكلم عن المزايا والعيوب

ونقول بسم الله الودود

1-فكرت كتير فى اول صفه ممكن اتكلم عنها جوايا لقيت الطيبه احسنها

2-والتانيه اجتماعيه بشكل رهيب ممكن اعتبره برضو من العيوب

3- يمكن اكون بحب كل الناس وخدومه الى حد ما وصبوره جدا

4- على طول بشوشه وودوده وصريحه ((بس مش فى كل الاحوال ))

5- بعز اصحابى جدا واهلى وبحسهم من غيرهم انى تايهه

6- واول العيوب طبعا العند بيقولولى دايما هند تحب العند

7-عصبيه احيانا يمكن اكون بصبر كتير لكن لما صبرى بيخلص بيبقى الموضوع رهيب

8-خجولة جدا جدا وبجد عيب خظير مش عارفه اتكلم عليه

واى كلمتين حلوين بيخلونى احمر واجيب الوان

9- على اد ما بفرح لكن لما حاجه تزعلنى بشد جامد فى الحزن وغالبا بقدر اخرج نفسى قبل ما ادخل فى اكتئاب

10- بحس انى مقصره فى حق نفسى وفى حق ربنا بس بحاول اعمل توازن وارضى نفسى وارضى ربنا والله المعين

وميرسى جدا انكم استحملتونى ولو حد شايف فيا حاجه زياده يدخل يقولها وهنيالك يا فاعل الخير والثواب

يدوم التاج (فوفا)

التاج دا من الجميله داليا رحاب in depth واحنا التلاته بنقولها ميرسى عالتدبيسه
اتكلم عن نفسك فى 10 جمل

1-طيبه وحنونه وحساسه ودمعتى قريبه

2-قلبى ابيض ومش بحب حد يزعل منى ولا بعرف ازعل من حدبروق بسرعه بكلمتين حلوين يعنى

3-رومانسيه وبحب الطبيعه والخضره والورد

4- مش بعرف اخد قرار بسهوله باخد وقت فى التفكير

5-مش جريئه اوى يعنى ممكن اخد قرار بقوه بس وقت التنفيذ مش بقدر للاسف

6-بحب اصحابى جدا وبحب اقضى معاهم معظم الوقت

7-بحب الاطفال جدا وبحب العب معاهم واعيش طفولتى

8- بحب اخرج واتفسح بس دا مش بيحصل كتير طبعا وبحب الهزار والضحك والمرح

9- اكتر حاجه بتاثر فيا اوى لما اشوف طفل بيبكى او عجوز محتاج مساعده

10- احيانا بكون متسرعه وبندم على قرار اخدته و دا شىء بيضايقنى اوى

حياه عايشنها ..... وحياه عايزنها..

السلام عليكم

كل سنه وانتوا طيبين الاول

البوست المره دى مختلف

دا اول حاجه كتبناها احنا التلاته مع بعض

كانت من سنه وكانت فى رمضان وحبينا نفتكرها معاكم

:::::::::::::::::::::::::::::::::::::::::::::::::::::::::::::::::::::::::::::::

يا فتاح يا عليم رزاق يا كريم
شوارع طويلة فيها بيوت كتيرة مرصوصة جنب بعضها
مليانة ستات ورجالة ,بنات و ولاد اللي صاحي واللي نايم
وادينا عايشين
طلع النهار كله قام
لا حد قال لحد صباح الخير ولا نمت كويس إمبارح ولا يحزنون
قايمين كسلانين,تعبانين,قرفانين من صحيانهم بدري
(ال بقى رايحين يقوموا بواجبهم تجاه البلد
يلا أهم صحيوا وخلاص وهتستمر الحياة
اللي رايح شغلة واللي رايح مدرسته واللي رايح كليته
وطبعا المدام يا إما راحة الشغل يا السوق
يا إما نايمة ولا هممها اللي بيحصل حواليها (ما علينا)
-تعالوا كدة نروح وراهم ونشوف هيحصل إيه؟
راح الولد مدرسته ويا عيني على جمال مدرسته
مدرسين نايمين لا بيهشوا ولا بينشوا
(طلبة ثانوي بقى سيبكم من ابتدائي وإعدادي ال يعني اسمهم أطفال
والله دول بقوا بيفهوا اكتر من الكبا ر
الطلبة بقى كل واحد عمال يحكي للتاني قصة حبه وغرامة قابل دي أزاي وكلم دي أزاي
ويا عيني بقى على المنافسات بينهم في الروايات والأساطير
وكل واحد فيهم بيحاول يثبت انه أحسن من التاني
بس في إيه.........في الغلط يا ولداه
لا وبيحاولوا يثبتوا جرائتهم ورجولتهم ويتخطوا حدودهم مع المدرسين
(لا حول ولا قوة إلا بالله)
كفاية كدة على الولاد لحسن يزعلوا
شوفوا بقى البنوتة اللي راحة المدرسة-لقت إيه القطة-
لقت صاحبتها بتقولها تعالي نطفش من الحصة دي انهارده,ليه
اصلي زهقانة -امممممممممممم-ماشي
تعالي بقى نستخبى ورا المبني الكبير-يا لهوي دول بنات هههههههههه يا فرحتي-
وتطفش البناتيت طب والحصص والفصل
-سيبيه بالي فيه-
مدرس غلبان يا عيني شخصيته ضعيفة -حظه الأسود وقعه في فصل البت الجريئة دي-
صوت عالي وتمرد مستمر (والله شوفت بعيني)
ولما يهزقها-عادي وماله-لا وبترد عليه وهو ....... نو كومنت
تعالوا بقى نطلع حوش قصدي فناء المدرسة(-لغة عربية فصحى هههههههه)
تلاقي مدرسة الألعاب لامه حواليها شوية بناتيت لا بسين زي موحد (تقوليش في الجيش)
عمالين يتنططوا والتانية عمالة تعزف بيعلموهم (رقصة الفراشة في بحيرة البجع)أه أمال إيه
(تقوليش داخلين مسابقة دولية هياخدوا كاس مصر وأفريقيا)
ارقصي ارقصي وماله أصلك يا عيني مش شايفة مدرسين رايحين جايين (اللي .........واللي ....)
عادي دا زي بابا (والله طب الحمد لله)شكرا على التوضيح منكم نستفيد

********************

تيتى تيتى تيت تيتى تيى تيت (دا صوت المنبه ) يا فتاح يا عليم يا رزاق يا كريم اصطبحنا...... يا بنى قوم بقى الساعة بقت حداشر هتروح كليتك امتى بس ؟؟؟؟؟؟؟؟؟؟؟؟؟؟ يووووووه يا ماما هروح الكليه من النجمة كدا بس صاحينى كمان ساعة . وعدت ساعة يا (.....................)خلاص هقوم هقوم أنا عارف بس على إيه وجع القلب دا كله ونزلت الشارع وبعد زحمة المواصلات واللبس اللى الواحد طلع عنيه فى مكوته نزل كأنه طالع من خناقه وف يا ساتر دا إيه دا؟؟؟؟؟؟؟)داخلين من الباب يا سيدى كرنيهات (يا دى الكرنيهات) سلامة النظر شايلين البلطوهاات وعديها دى ........ ندخل نشوف ولاد كتير وبنات كتيير الله الله دا تحت الكوبري فى أساطير............ وناس بتقوووول والله بودننا سامعيين ((يا بنى دا في هنا شوية مناظر والله عايزاك)) وندخل جوه شويه في ناس ع السلم مرمية وناس في المدرج نايمة ومتدفية وناس وناس وكفاية أحسن خلاص............ ونشوف الموظف رايح لشغله رايح ( لرشوة و وشايا ............)وكله بيغضب الرحمن وتيجى تكلمه يقولك (فوت علينا بكرة يا سيد) (يا عم دا أنا غلبان بطلب معاشي ومش قادر وتعبان) (رش المية يا إبراهيم) يا عم حرام عليك دا تلاقيه مش لاقى حق التاكسي اللي هيجي تانى بييه (يووووووه تاكسي إيه قصدي ميكروباص)هي مهنتك دي لتذليل الصعاب ولا لإذلال الرقاب ونيجى للعامل الغلبان عامل إضراااااب ياااااااه دا إجرام بيطالب بحقه وحق ولا ده لاء متعودناش دي الحكاية فيها إن حق إيه اللي أنت جي تقول عليه؟؟؟؟؟ (على رأى الست)والراجل بيقول يا باسط بطالب بحقي يا جدعان....................... هاااااااااااااااااااااااه (تنهيده تانى)وع البيت مشيت وأخيرا هديت وقدام باب الشقة اتحطيت
*******************
رنيت الجرس( ويا ريتني ما رنيته ) وبعد نص ساعة تقريبا الباب أتفتح وأبص ملاقيش حد المهم دخلت لقيت إيه ؟؟؟؟ هقولكم بقي لقيت إيه !!!؟؟ إيه الصوت العالي ده مين اللي رامي هدومه هنا كده حرام عليكم كتب مين دي؟؟ موبايل مين ده ؟؟؟ فيييييييين الغدا يا ماما ثواني وهيكون جاهز ياماما ورايا درس خلصي بقي حاضر ثواني بس .... مـــــــــــــامــــــــــــــــا صحابي مستنين عايز أكل يا ناس .......حاضر حاضر ... وتتوالي الصرخات يا ماما فين...؟؟ يا ماما يا ماما , أنتي يا هانم .. ماما ...هانم ... ماما ....يا هانم يا عيني عليكي يا ماما حبه وهيكلوكي خلاص ........... والهانم جهزت الغدا خلاص وماتت من التعب ...... أكلوا والحمد لله...... وكل واحد شاف مصلحته ... الأب دخل نام طبعا أصله كان تعبان في الشغل ) الولد خرج مع صحابه ( أصله يا عيني في المدرسة طول النهار بيلعب) البنت راحت الدرس (البنات طول عمرها ملتزمة ... حد عنده اعتراض ؟؟ ) وماما طبعا لسه في المطبخ ( أصلها مزروعة فيه طول النهار)... وبعد اللي كان بره ما رجع واللي كان نايم صحي (طيب مش يجمعوا شويه لا أزاي ده عيب ) البنت قاعدة في قوضتها ترغي في التليفون (مكفهاش كلام طول النهار ) والولد قاعد علي الكمبيوتر (نت بقي وشات والذي منه ) والأب طبعا فاتح المفسيديون وبيتفرج علي الماتش و صوته عالي (يالا يا ولا شوووووط يارب جووووون يارب ) طيب والهانم الغلبانة دي قالت أقوم أنام بقي يعني أنا مليش نفس أنام زيهم ولا إيه (بيبصوا لبعض في النوم ) نامي نامي يعيني عليكي (هو أنتي أصلا وراكي إيه غير المطبخ والنوم ؟؟) الليل ليل علينا واللي جه جه والي نام تاني نام والي بدا يذاكر (ضحك علي الدقون ) واللي سهران قدام اللي ميتسماش المفسيديون طبعا ولا حتى قدام الكمبيوتر.......... وبكده أصبح مصدر تعليم البنت والولد المدرسة والكلية والنت والتلفزيون .... واهي ماشيه الحياة ... وانتهي اليوم ويبدأ يوم جديد ومع كل يوم نحلم بالتغيير بس ده أكيد مستحيل ..... وتتوالي الأيام والأحداث وتبدأ الأسرة في الانهيار (إذا لم تكون انهارت بالفعل ) كل فرد من أفرادها عايش حياته الخاصة وطريقته اللي ماشي بيها من غير ما يلجأ لحد أو حتى يطلب نصيحة وحتى لو حد نصحه مش بيسمعله ويقوله أنا حر ودي أخرت الحرية بعد ما تقع الكارثة ندور علي مين السبب فيها وكله يرمي العبء علي التاني ونسيوا كلهم إن المسئولية مشتركه وإنهم كلهم غلطوا وكانوا احد أسباب انهيار الأسرة ولنا فقط أن نقول حينذ ( إنا لله وإنا إليه راجعون). توفيت الأسرة المصرية .............
دا كان مجرد عرض هزلي بسيط لأحد ا

لبيوت المصرية في هذا الزمن
بالفعل هناك بيوت أخري أفضل من ذلك بكثير وبينها ترابط عظيم
ولكن السائد في هذا العصر الذي نعيش فيه هو تلك الصورة السيئة
فلعلنا نفيق مما نحن فيه ونحاول إعادة الترابط إلى بيوتنا
وإذا كان الآباء والأمهات قد فشلوا في ذلك
فنحاول نحن الجيل الجديد أن نقيم ذلك في بيوتنا المستقبلية
والله المستعان (فوفا)

دي صورة حياتنا اللي عايشنها ...........
شوفتها...........
وراضى عنها..............
دلوقتي أنت الطالب .........بس بكرة يا ترى هتقبل تكون (سيد..............)
إحنا اللي هنعمل حياتنا اللي عايزنها............... (نودى)

كده خلصنا كلامنا ويا رب يوصلكم المعني .. ونحول حياتنا الجايه لأحلي حياة في الدنيا وده مش صعب علينا ده ممكن يكون في ايدينا (هنوده)

الحلقه الاخيره

سمعت كونوز باباها بيحكى لمامتها كلام غريب طلعت جرى علشان تشوف فى ايه
كونوز: فى ايه يا بابى ؟ مالك؟
الاب : فى احتلال فى ناس غربا احتلوا بلدنا وهياخدوا مننا كل حاجه فلوسنا وعربياتنا حتى اليوت اللى احنا عايشين فيها
كونوز: مين اللى هيحتلونا دول يا بابى ؟
الاب : ناس متجمعين من دول تانيه وشافوا ان العالم بئى متقسم لطبقتين بس وهما مش عايزين كدا
فقررواانهم يحاربوا كل الاغنيا وياخدوا الفلوس اللى عندهم وكل حاجه عشان يرجعوا العالم تانى زى ما كان
بس طبعا دا الهدف اللى هما بيصرحوا بيه بس هما ليهم اهداف تانيه هما عايزين يسيطروا على بلدنا ويسرقونا
كونوز: يعنى هما خلا ص دخلوا البلد
الاب :ايوه وكمان احتلوا الشركه بتاعتنا اومال انا جاى بدرى من الشغل ليه
وبيموتوا اى حد بيكلمهم وادونا فرصه يوم كمان عشان نسيب بيوتنا ليهم والا هيموتونا
الام: مش معقول انا مش مصدقه هنعمل ايه وهنروح فين
الاب : مش عارف مش عارف
كونوز :انا مش مصدقه يابابا كل دا حصل فجأه كدا
الاب: هما اكيد كانوا مخططين من زمان وعنصر المفاجأ ه هو اللى نجح خطتهم

وقعدت كونوز تفكر فى المشكله الكبيره اللى هما فيها وهيعملو ا ايه وهيروحوا فين وفجأه جاتلها فكره
كونوز: بابى طيب هما هيروحوا تحت كمان
الاب : تحت فين
كونوز: عند الفقرا
الاب: لا طبعا عشان ينقلوا ليهم الامراض والجراثيم
كونوز: يبقى خلاص نروح عندهم
الام: ازاى هنقدر نعيش هناك مش ممكن
كونوز: لو قعدنا واستنينا الاحتلال هيموتنا يا مامى
وقدرت كونوز انها تقنع باباها ومامتها انهم يعيشوا عند الناس الفقرا لحد ما الاحتلال يرجع لهم بلدهم تانى
وقعدت تبعت مسجات لكل اصاحبها بالفكره بتاعتهاوقبل ما يجى اليوم التانى راحت كونوز هى وكل اهلها وصحابها
عشان يقعدوا عند موروز وهى فى الطريق قابلت موروزز واصحابه

كونوز: موروز احنا كنا جايين نقعد عندكم
موروز: ليه هتيجوا تصيفوا عندنا فى الخرابه ولا ايه
كونوز: لا يا موروز اصل فى ناس اقوى مننا احتلونا اخدوا كل فلوسنا وبيوتنا وانا قلت لبابى نيجى نقعد عندكم
كونوز: يعنى مش هتضايقوا لو قعدنا معاكم شويه ؟
موروز:نتضايق مين يا كونوز دى الخرابات هتنور
كونوز : ميرسى اوى يا موروز
تيتوز :خرابتنا لسه موجوده ولا اجرتوها لحد انتوا حرين دى تبقى سرقه
موروز:سرقه مين ياض احنا برضوا اللى بنسرق وبعدين خرابه ايه اللى بتدور عليها
بدل ما تقول كتر خيرك يا موروز
يلا ياض ارجع ياض انت ايه اللى جابك هنا اصلا
تيتوز: اوف هنرجع للذل تانى
واول ما وصلوا للخرابات كل الناس صعقت من المناظر اللى قدامهم مش مصدقين وعمالين يكلموا نفسهم هنعيش هنا ازاى
وهناكل ايه وهنام فين ايه القرف دا
واتقسموا مجموعات وكل مجموعه اخدت خرابه
موروز: يلا انت بقى يا تيتوز تعالا معايا خرابه السفح عشان مفيش حد هيرضى يروح هناك
تيتوز: ياى السفح انا اروح هناك مش ممكن
موروز:يلا ياض ارجع ياض انت ايه اللى جابك هنا اصلا
تيتوز: خلاص خلاص متزؤش بس
وعاش الاغنيا مع الفقرا يتابعوا اخبار الاحتلال من بعيد ومستنين اليوم اللى يرجعوا فيه لحياتهم
وفى نفس الوقت كان موروز وكونوز بيخططوا ازاى يزيلوا الفجوه بين الاتننين وازاى يواجهوا الاحتلال دا
وبدأ موروز يتقرب منهم ويقرب بين اهله وبين الاغنيا وبدأت الفجوه تتلاشى تدريجيا لكن كان فى بعض الناس المغرورين وناس تانيه لسه
مش قادرين يعيشوا مع الناس دول ولا قادرين انهم يقتنعوا انهم بنى ادمين زيعم
موروز: يا حلاوه يا ولاه مين كان يصدق ان دا كله ممكن يحصل
كونوز :اه صح ربنا يزيد ويبارك
تيتوز: ايه دا يا كونوز انتى هتتعلمى الكلام دا منهم ولا ايه
موروز :تانى يلا ياض ارجع ياض انت ايه اللى جابك هنا اصلا
وحاول الاغنيا انهم يعيشوا مع الناس الفقرا وحاول الفقرا يتعلموا من الاغنيا الحاجات اللى مكنش عندهم فرصه يتعلموها
وبداو يفكر مع بعض ازاى يقدروا يطلعوا الاحتلال من بلدهم
وعرفوا ان دا مش هيحصل ابدا الا لما يتعاونوا مع بعض ويزيلوا الفجوه اللى اتكونت بين الفقرا والاغنيا طول الوقت اللى فات
وموروز قرر انه يتعلم حاجات كتير قرر يتعلم اللا ب بتاع كونوز ويرجع القلم للاسطى بتاعه اصل كونوز ادتله قلم هديه من الجامدين بتوعها دول
وكمان قرر يودى كل الولاد خرابه السفح عشان ميبقاش فى حد احسن من حد

حتى تيتوز طلع نوع جديد سماه تيتوز بالجبنه وحالو يتخلى فيه عن غروره بس تيتوز بالشطه برضو لسه موجود

كونوز : تفتكروا هنقدر نخرج الناس اللى احتلونا من ارضنا ونرجع لبيوتنا تانى
موروز: تفتكروا هنفضل ايد واحده بعد ما يخرجوا
تيتوز: لا طبعا لا هيخرجوا ولا هنفضل ايد واحد
موروز: يلا ياض ارجع ياض انت ايه اللى جابك هنا اصلا
ههههههههههههههههههههههههه

كونوز وموروز الحلقه الخامسه

روحت كونوز عالبيت وكانت خلاص الفكره سيطرت عليها قررت كونوز انها تزور موروز وكمان عشان تشوف المكان اللى تيتوز كان عايش فيه وبسرعه ركبت كونوز السوبر كار بتاعتها وطارت عالحاره اللى موروز عايش فيها ونوت تتمشى شويه فى الشارع شافت ناس غريبه عايشيين فى الخرابات وناس بتتخانق مع ناس
وناس عايشيين فى الشارع وناس بتاكل فى الشارع حتى الاطفال اللى زيها مش بيروحوا النادى عشان يلعبوا هناك دول بيلعبوا فى الشارع ومش بيلعبوا بالالعاب زيها
دول بيلعبوا بالطوب والحجاره والجو كمان حر اوى ومفيش تكييف دا غير الريحه اللى جايه من الزباله وكمان الطوب اللى مرمى فى كل مكان
كل دا دار فى دماغ كونوز لما شافت كل دا بعنيها كونوز كانت دايما بتسمع عن الناس الفقرا بس دى كانت اول مره تشوفهم وكملت كونوز طريقها لبيت موروز وهى متنحه
بس فى حاجه غريبه شافتها كونوز و عجبتها اوى عند الناس الفقرا فى الحاره عجبها التوك توك لانه فكرها بلعبه كانت بتحبها فى الملاهى وركبت التوك توك وطلبت من صاحبه انه يوديها على بيت موروز وقالت بصوت واطى :(( ودينى عند موروز))
طبعا صاحب التوك توك برق وقالها :(( وتطلع فين موروز دى يا مزمزيه ))
كونوز باستغراب:(( مزمزيه !!!!!! بقولك فى واحد اسمه موروز ساكن هنا عايزه اروح عنده))
المهم صاحب التوكتوك قعد يسال لحد ما وصل كونوز لبيت موروز
ولما وصلت كونوز هناك قدام البيت لقت بيت موروز من غير باب زى كل البيوت هناك فى الحاره
فدخلت كونوز من غير ما تستاذن
ولقت مرورز بشعره المنكوش وعمال يزعق بصوت عالى لاخواته عشان واحد فيهم اخد السندوتش بتاعه وفجأه وهو بيزعق شاف كونوز قدامه
موروز اتكسف وقالها :(( دا انا كنت بهزر مع اخواتى وبنلعب))
اهلا اهلا اتفضلى اتفضلى انت جايه ليه وفى سره (( هي ناقصاكى ضيعتى عليا السندوتش منك لله))
كونوز: جايه ازورك يا موروز وكدا يعنى مش انت زرتنى
موروز: يالهوى عالبببببببخل انتى منهم جايه تاخدى حق العصير اللى شربته عندكم ولا ايه
كونوز : لا طبعا انا جايه ازورك بس انت زعلت ولا ايه
موروز: منوره يا كونوز وفى سره (( وليكى عين كمان مش كفايه ضيعتى عليا السندوتش))
نهايته احنا مفيش عندنا حاجه تتشرب والسندوتش اللى حيلتى اخواتى لسه لاطشينه اقولك تعالى لما افسحك فى الخرابه اللى جنبا
كونوز: هيييييييه بس هى فين اوضتك هنا بقى يا موروز؟
موروز: هيا دى
كونوز: طب فين الليفنج روم؟
موروز: هيا دى
كونوز:برضو طيب فين المطبخ ؟؟
موروز:ههههههههه مش لما يبقى فى اكل الاول نبقى نعمل مطبخ
كونوز: هو البيت عندكم كله اوضه واحده
موروز: هههههه قصدك خرابه واحده احنا كنا بنفكر نوسع ونضم الخرابه اللى جنبنا بس جالها سكان جداد قلنا يلا هما اولى عشان ازمه السكن
كونوز : طب يلا نتفسح بقى وعرفنى على صحابك
موروز : صحاب مين انتى مش عايزه تروحى بيتكم سليمه
وهما ماشيين فى طريقهم للخرابه
كونوز :انت عايش هنا ازاى
موروز: انا اتولدت لقيت اهلى عايشين هنا عشت زيهم هعمل ايه
اهو هى دى الخرابه اللى احنا بنلعب فيها يا ستى وادى البيت اللى واد تيتوز كان عايش فيه بس دلوقتى ربنا فتح عليهم بقى
وكونز مكنتش مصدقه كل دا وروحت وهى مهمومه وزعلانه عشان الناس اللى مش عارفيين يعيشوا وافتكرت كل الكلام والحكايات والكارتون اللى كانت بتشوفه عن الفقرا
ولما بابااها شاف كونوز وهى متضايقه سالها وحكت له عن الناس الفقرا اللى شافته وازاى هما عايشين
زعق لها وقالها انها مش هتروح تانى هناك وكمان مش هتروح تانى المدرسه بتاع الفقرا
وهتروح مدرسه باباها هو اللى هيختارها
زعلت كونوز اكتر واكتر وعدت فتره وهى قاعده فى اوضتها زعلانه عشان مش هتروح مدرستها تانى ومش هتشوف موروز
وفى يوم وهى قاعده فى اوضتها سمعت باباها وهو بيكلم ماماتها وبيقولوا كلام غريب اوى وكانوا خايفيين كونوز خافت اوى وطلعت جرى عشان تشوف فى ايه؟؟؟؟

كونوز وموروز (الحلقه الرابعه)

وفجأة برق موروز اكتر واكتر لما سمع حد بيقول . :هااااااي كونوز

كونوز:هااااي
موروز وهو مبرق عنيه .:مين الاخ !!!
كونوز:ايه
موروز:الي كان بيهاي ده
كونوز تنحت:بيهاي اممممممم اه دا تيتوز صاحبي بس مش اوي يعني
موروز :صاحبك!!!!!! يانهار ياولاه ,طب ازاي,من زمان يعني ؟
كونوز:لا هو مش كان موجود ,فجأة لقيته سكن في الفيلا اللي جنبنا
ولم اسأله كنت عايش فين يقولي اوت
موروز(اوت):لالالالالا دا كداااااااب من يومه

ماكانشي في خرابة عندنا اسمها اوت خالص

كونوز:ايه خرابة دي ياموروز انا اقصد كان برا مصر يعني
موروز:اه امال ايه طب مانا عارف *ايه الاحراج ده عديها بقى *
ايوة قوليلي قوليلي بقى الواد ده طلع هنا طب والله عال
كونوز:هو في ايه انت تعرفه؟
موروز :اعرفه؟!! والله العظيم هههههههههههه
يابنتي انا اعرفه عز المعرفه
كونوز:تعرفه منين بقى انت كنت اوت برضوا؟
موروز:هههههههههه اوت انا اخري خرابة السفح وارجع
والعيال بيقولوا عليا مقطع السمكة وزعانفها اه امال ايه
مفيش حد كان بيروح هناك غيري والواد....
كونوز قاطعته وهي مكشرة
كونوز:موروز براحة ايه السفح دي
موروز في سره*وبتشخط كمان مش كفاية صابر عليكي وانتى مش بتفهمي كدة*
دي ابعد خرابة في المنطقة كلها وجنبها بلاوي زرقة ماقولكيش
والواد تيتوز كان يبقى مفروس مني عشان انا بس اللي بروح هناك
ههههههههه فكرتيني ياشيخة يخرب بيت عقلك
كونوز لسه مذهولة :وايه كمان كمل انت كلامك جميل اوى
موروز في سره*هو انا بحكي حدوته*:طيب دا بقى ياستي كان ابن اغني واحد عندنا في الحتة
اه كان ابن بتاع الطعمية لا وايه كان بيغيظ العيال كلها.
كلنا نبقى جايبين شاندوتش طعمية واحد وهو معاه اتنين _
كونوز:امممممممم شاندوتش وطعمية !!! . وقعدت تفكر
موروز:اه امال ايه,يالهوك ياتيتوز بقى انت اختفيت من تحت وطلعت هنا
,ليلتك بني مشجر .
كونوز:بني مشجر كمان!!!!!!
وهي مكشرة تاني:موروز ممكن براحة عليا شوية عشان افهم لغتك دي
موروز في سره*هو انا بتكلم فرنساوي ياولاد*
ااااااااه الرقة ليها ناسها برضوا
كونوز:امممممممم طب تيجي تتكلم معاه هو اكيد راح النادي
دا معاد التدريب بتاعه
موروز:والله واتنجرنا وبقينا بنروح نوادي يا ولاه
وديني وماله
وراحوا الاتنين وهناك اول ماتيتوز شافه بدأ يتهرب بس على مين
كونوز:تعالي ياتيتوز اعرفك على صاحبي موروز دا عسول اوي
تيتوز (وشه جاب الوان):لالالا اصلي مشغول ياكونوز بعدين بقى
موروز طبعا مش هيسكت هجم وقال:تيتوز بالشطة والليمون
ازيك ياض اخبار الحراق معاك ايه
تيتوز:انت تعرفني منين ياأخ انت
موروز:عيب عليك ياض ,هتتهرب مني انا كان غيرك اشطر ياأمور\
تيتوز:الله هي تلاقيح جتت ماتحل عننا يابني
اوبااااااا اخينا بدأ يقع ويبان على حقيقته .
وكونوز ياعيني متنحة وبتفكروعمالة تكلم نفسها* تلاقيح جتت* كل دي كلمة
موروز:يابني مش على موروز يغرك الطعمية والخرابات المستخبية والذي منه
كونوز مش فاهمة حاجة في اي حاجة
تيتوز :اللهم طولك ياروح
موروز:جري ايه ياض ,نسيت ابوك اللي كان بيعمل الطعمية
في زيت معششة فيه كل مخلوقات ربك الزاحفة والطايرة
تيتوز:جري ايه ياض وانت ابوك يعني اللي كان ميه ميه

واخينا بدأ يقع ويبان على حقيقته
وكونوز مش مصدقة الكلام اللي بتسمعه
موروز:ياعيني عليك ياموروز حريف من يومك ياض تفوت في الحديد
وتعرف الكفت ,خمسة عليك- فلة عليك,خمسة عليك -فلة عليك
وكونوز عمالة تضحك على حركات موروز اللي بيعملها يايديه ورجليه
والكلام الغريب اللي بيغنيه
وقال:يعني طلعتوا اصحاب اوي كمان
تيتوز :منك لله ولساه ابيضاني وحلوية من يومك ياموروز
موروز:وصلتم لهنا ازاي ياض,بين يوم وليلة كدة
تيتوز:اه ياعم مش ابويا كان بيكد ويتعب من يومه
موروز:اه في الزيت المحروق ههههههههه عليا انا ياتيتوز والله عال

(ودي صورة من الصور اللي منتشرة حوالينا بس اكيد بكرة هتبقى اكتر واكتر الف مرة
ناس بين يوم وليلة بتطلع من سابع ارض لسابع سما
ولا حد بيسألهم ازاي ولا منين والوسايل ياااااااااما
كتيرة من غير تعب ولا كد
لا ومش بس غنى من غير حد لا دا كمان
غرورو وتكبر على ناس كانوا وسطهم في يوم من الايام
بس دا طبيعي لناس اغتنيت وكسبت مال على حساب دم الغلابة والمساكين مصوا دمهم واكلوا لحمهم). وخلص الحوار بين كونوز وموروز وتيتوز وقال
موروز :انا مروح بقى
وطلبت كونوز من الروبوت بتاعها يوصل موروز بالسوبر سونيك كار
وطبعا اخينا لما سمع كدة بدأ يجهز ريشه عشان ينفشه
قدام العيال اول ما يدخل حتتهم
وبعد ما مشي موروز خطر على بال كونوز حاجة مهمة اوى بالنسبة ليها!!!!!!!!!؟؟؟؟؟؟؟؟؟؟؟